नेपालमा नाकाबन्दी लगाउने मोदीलाई नेपालमै स्वागत गर्नु राष्ट्रिय स्वाभिमानका विरुद्ध हुने भन्दै बिरोध गर्ने तयारी

काठमाडौं । भारतीय प्रधानमन्त्री नरेन्द्र मोदीको बैशाख अन्तिममा हुने नेपाल भ्रमणलाई कम्युनिस्ट पार्टी मसालले विरोध गर्ने भएको छ । विरोध स्वरुप उस्ले भनेको छ मोदीलाई नेपालमा स्वागत गर्नु राष्ट्रिय स्वाभिमानविरुद्ध हुन्छ ।

कम्युनिस्ट पार्टी मसालका महामन्त्री मोहनविक्रम सिंहले सोमबार आज विज्ञप्ति निकालेर बतायो ‘हाम्रो पार्टीको यो स्पष्ट र दृढ मत छ कि मोदीलाई नेपालमा स्वागत गर्नु नेपालको राष्ट्रिय स्वाभिमान र सम्मानका विरुद्धको कुरा हुनेछ ।’

नेपालको संविधान जारी हुन नदिन मोदी सरकारले दवाव दिएको, नेपालविरुद्ध नाकाबन्दी लगाएको, नेपालको संविधानविरुद्ध अन्तर्राष्ट्रिय अभियान चलाएको, तराईलाई नेपालबाट अलग गराउन पृथकतावादी समूहलाई उक्साउने काम गरेको र नेपालमा आफ्नो एकलौटी बजार कायम गर्न अहिलेसम्म पारवहन सन्धिलाई पनि अनुमोदन नगरेको आरोप मसालले लगाएको छ ।

त्यसैले मसालको विज्ञप्तिमा लेखिएको छ, ‘मोदी कुनै पनि अवस्थामा नेपालका मित्र होइनन्, त्यसैले हामीले उनको सरकारी वा गैरसरकारीस्तरमा स्वागत गर्ने कुनै पनि कार्यको कडा शब्दमा विरोध गर्दछौं ।’

मोदीको नेपाल भ्रमणको उद्देश्य विस्तारवादी नीति अन्तर्गत नै हुन लागेको मसालको ठहर छ ।

Add Comment